ನಿಸ್ವನ - ನನ್ನ ನಿನ್ನ ಲೋಕ

ನಿಸ್ವನದ ಭಾಗವಾಗಿ...

• ಕವನ: ಎಂ ಗೋಪಾಲಕೃಷ್ಣ ಅಡಿಗ
• ಕವನದ ಕಾಪೀರೈಟ್ ಕೃಪೆ: ಎಂ ಗೋಪಾಲಕೃಷ್ಣ ಅಡಿಗ ಮೆಮೋರಿಯಲ್ ಟ್ರಸ್ಟ್, ಬೆಂಗಳೂರು
• ರಾಗಸಂಯೋಜನೆ/ಗಾಯನ/ವೀಣೆ: ಅಂಶುಮಾನ್ ಕೆ ಆರ್
• ಸ್ಟೂಡಿಯೋ/ವಾದ್ಯಸಂಯೋಜನೆ: ಹೇಮಂತ್ ಕುಮಾರ್
• ಗಿಟಾರ್: ಡಿ ಶ್ರೀನಿವಾಸ್ ಆಚಾರ್ (ಗಿಟಾರ್ ಶ್ರೀನಿವಾಸ್)
• ತಾಳವಾದ್ಯ: ಬಿ ಎಸ್ ವೇಣುಗೋಪಾಲ್ ರಾಜು (ತಬಲಾ ವೇಣು)
• ಕೀಬೋರ್ಡ್: ಟೋನಿ ಮ್ಯಾಥ್ಯೂ
• ರಿದಮ್ ಪ್ಯಾಡ್: ವರದರಾಜ್
• ಧ್ವನಿತಂತ್ರಜ್ಞಾನ/ಕೀಬೋರ್ಡ್: ಬಾಲಕೃಷ್ಣ ರಾವ್

ಗೋಪಾಲಕೃಷ್ಣ ಅಡಿಗರ "ನನ್ನ ನಿನ್ನ ಲೋಕ" ಎಂಬ ಈ ಕವನ, ಅವರ "ನಡೆದು ಬಂದ ದಾರಿ" ಸಂಕಲನದಲ್ಲಿದೆ.

ಕರ್ನಾಟಕ ಶಾಸ್ತ್ರೀಯ ಸಂಗೀತದ ನಾಟಕುರುಂಜಿ ರಾಗದಲ್ಲಿರುವ ಈ ಹಾಡಿನಲ್ಲಿ, ಶಾಸ್ತ್ರೀಯ ಶೈಲಿಯ ವೀಣೆ ಹಾಗೂ Jazz ಶೈಲಿಯ ಗಿಟಾರ್-ಗಳು ಕೇಳುಗರನ್ನು ಕವನದ ಕನಸಿನ ಲೋಕಕ್ಕೆ ಕೊಂಡೊಯ್ಯುತ್ತವೆ. ಕವನದ ವಿಷಯದಂತೆಯೇ, ಕರ್ನಾಟಕ ಶಾಸ್ತ್ರೀಯ ಹಾಗೂ Jazz ಶೈಲಿಗಳೂ ಹದವಾಗುವ ಕನಸಿನ ಲೋಕವೂ ಇಲ್ಲಿದೆ. ಹೆಚ್ಚಿನ ವಿವರಗಳನ್ನು video ವಿವರಣೆಯಲ್ಲಿರುವ timestamp, chapterಗಳಲ್ಲಿ ನೋಡಬಹುದು.

ಇಡೀ ಕವನ ಹೀಗಿದೆ.

ನನ್ನ ನಿನ್ನ ಲೋಕ

೧

ನನ್ನ ನಿನ್ನ ಲೋಕವೊಂದು ಬೇರೆಯೊಂದು ಇದ್ದರೆ

ನನ್ನ ನಿನ್ನ ಜೀವವೆರಡು ಈ ಭವವ ಗೆದ್ದರೆ

ತನುವ ತೆರೆಯು ಕರಗಿ ಶುದ್ಧಮನವು ಮೇಲಕೆದ್ದರೆ

ಏನು ಗಾಡಿ ಏನು ಮೋಡಿಯಿಂದ ಬಾಳುತಿದ್ದೆವೆ!

ಒಲವೊಂದನೆ ಬಿತ್ತಿ ಬೆಳೆದು

ನಲವೊಂದನೆ ತುತ್ತುವಡೆದು

ಚೆಲುವೊಂದನೆ ಹೊತ್ತು ಹಡೆದು

ಹೇಗೆ ಹಿಗ್ಗುತಿದ್ದೆವೆ,

ಹೇಗೆ ಹಿಗ್ಗುತಿದ್ದೆವು!

೨

ನೀನು ಸಖಿ ನಾನು ಸಖ; ನಿನ್ನ ಸುಖವೆ ನನ್ನ ಸುಖ;

ಬರಲಿ ನಾಕ ಬರಲಿ ನರಕ - ನಮ್ಮ ಗಮನಕೊಂದೆ ಮುಖ;

ಮನಮನವೂ ಎರಕದೆಸಕ, ಭಾವ ಜೀವ ಏಕ ಏಕ

ಎಂದು ಬಾಳುತಿದ್ದೆವು;

ಅಲ್ಲಿ ಇಲ್ಲಿ ಹಾಗೆ ಹೀಗೆ ನಾವು ತಿರುಗುತಿದ್ದೆವು!

೩

ದೂರ ದೂರ ಬಾನು ಬಾಗಿ ಬುವಿಗೆ ಮುದ್ದನಿಡುವೆಡೆ;

ಹಾರಿ ಬಂದು ಮುಗಿಲ ಹಿಂಡು ಗಿರಿಯ ತಬ್ಬುತಿರುವೆಡೆ;

ಅಲ್ಲಿ ಹುಲ್ಲೆ ಇಲ್ಲಿ ಜಿಂಕೆ ಜಿಗಿದು ನೆಗೆದು ನಲಿವೆಡೆ

ಎಲ್ಲಿ ಬಳ್ಳಿ ಬಾಗಿ ಬಾಗಿ

ಹೊನಲ ಕನ್ನಡಿಯಲಿ ನೋಡಿ

ತನ್ನ ಸೊಬಗಿಗಾಗಿ ತಾನೆ

ಬೀಗುತಿರುವುದೋ;

ಬೀಗಿ ನಿಂತು ಬಿಂಕದಿಂದ

ಹೂವು ತುಟಿಗಳನ್ನು ತೆರೆದು

ನಗುತಲಿರುವುದೋ;

ಎಲ್ಲಿ ಹರಿವ ಮೊರೆವ ಹೊನಲು

ತನ್ನ ಎದೆಯ ಪಾಡನೆಲ್ಲ

ತೋಡಿ ಹೇಳುತಿರುವುದೋ;

ಎಲ್ಲಿ ಹಕ್ಕಿ ಗಿಡಗಿಡದಲಿ

ತಳುವಿ ತಳುವಿ ಎದೆಗಡಲಲಿ

ನೆಗೆವ ಭಾವವೀಚಿಗಳನು 

ಮೊಗೆಯುತಿರುವುದೋ;

ಅಲ್ಲಿನೊಂದು ಕಂದರದಲಿ, ಬಳ್ಳಿ ಸಮೆದ ಹಂದರದಲಿ

ಅಲ್ಲಿ ರವಿಯ ಕಿರಣ ತಳಿರಿನಲ್ಲಿ ಸೋಸಿ ಬರುತಿರೆ,

ಗಂಧರ್ವಗಾನಲಹರಿ ಎಲರೊಳೀಸಿ ಬರುತಿರೆ;

ಜಗಕೆ ಜನಕೆ ಬಹಳ ದೂರ,

ಹಗೆಯ ಹೊಗೆಗೆ ದೂರ ದೂರ,

ಸಣ್ಣತನದ ಕೊರಗು, ಮರುಗು

ನಮ್ಮ ಬಳಿಗು ಸುಳಿಯದಿರಲು;

ಅಲ್ಲಿ ನಾವು ನಿರ್ವಿಕಲ್ಪ

ಸುಖದ ವಿಮಲ ಕುಸುಮತಲ್ಪ -

ಅದರೊಳೊರಗಿ ಕಲ್ಪ ಕಲ್ಪ

ಮರೆತು ಸಾಗುತಿದ್ದೆವು;

ಕನಸುನಾಡಿನಲ್ಲಿ ಹಾಗೆ

ತಿರುಗುತಿದ್ದೆವು!

ನನ್ನ ನಿನ್ನ ಲೋಕವೊಂದು ಬೇರೆಯೊಂದು ಇದ್ದರೆ,

ಬೇರದೊಂದು ಇದ್ದರೆ!

- ಎಂ ಗೋಪಾಲಕೃಷ್ಣ ಅಡಿಗ

ನಡೆದು ಬಂದ ದಾರಿ: 180

ಪ್ರಕಾಶನ: 1952

ಈ ಹಾಡುಗಳೆಲ್ಲವೂ Creative Commons Attribution-NonCommercial-NoDerivatives 4.0 International License ಹಾಗೂ standard YouTube license ಮೂಲಕ ಲಭ್ಯವಿವೆ. ಕವನದ Copyright ಇದರಲ್ಲಿ ಒಳಗೊಂಡಿಲ್ಲ.

These songs are licensed under a Creative Commons Attribution-NonCommercial-NoDerivatives 4.0 International License and standard YouTube license. This does not include the copyright on the poem.