ನಿಸ್ವನ - ಅಗೋ ಅಲ್ಲಿ ದೂರದಲ್ಲಿ

ನಿಸ್ವನದ ಭಾಗವಾಗಿ...

• ಕವನ: ಅಂಬಿಕಾತನಯದತ್ತ
• ಕವನದ ಕಾಪೀರೈಟ್: ಪುನರ್ವಸು ಬೇಂದ್ರೆ
• ಗಾಯನ: ವಾರಿಜಾಶ್ರೀ
• ರಾಗಸಂಯೋಜನೆ: ಅಂಶುಮಾನ್ ಕೆ ಆರ್
• ಸ್ಟೂಡಿಯೋ/ವಾದ್ಯಸಂಯೋಜನೆ/ಕೀಬೋರ್ಡ್: ಹೇಮಂತ್ ಕುಮಾರ್
• ಗಿಟಾರ್: ಡಿ ಶ್ರೀನಿವಾಸ್ ಆಚಾರ್ (ಗಿಟಾರ್ ಶ್ರೀನಿವಾಸ್)
• ತಾಳವಾದ್ಯ: ಬಿ ಎಸ್ ವೇಣುಗೋಪಾಲ್ ರಾಜು (ತಬಲಾ ವೇಣು)
• ಬಾನ್ಸುರೀ/ಕೊಳಲು: ರಘುನಂದನ್ ರಾಮಕೃಷ್ಣ
• ರಿದಮ್ ಪ್ಯಾಡ್: ವರದರಾಜ್
• ಕೀಬೋರ್ಡ್: ಟೋನಿ ಮ್ಯಾಥ್ಯೂ
• ಕೀಬೋರ್ಡ್ /ಧ್ವನಿತಂತ್ರಜ್ಞಾನ: ಬಾಲಕೃಷ್ಣ ರಾವ್

ಗಣರಾಜ್ಯೊತ್ಸವದ ಶುಭಾಶಯಗಳೊಂದಿಗೆ,  ವಾರಿಜಾಶ್ರೀಯವರ ಮಧುರಕಂಠದಲ್ಲಿ ಅಂಬಿಕಾತನಯದತ್ತರ "ಅಗೋ ಅಲ್ಲಿ ದೂರದಲ್ಲಿ" (ಅವರ "ನಾದಲೀಲೆ" ಸಂಕಲನದಲ್ಲಿದೆ).

ಹಿಂದೂಸ್ಥಾನೀ ಶಾಸ್ತ್ರೀಯ ಸಂಗೀತದ ಮಾಂಡ್ ರಾಗದಲ್ಲಿರುವ ಈ ಹಾಡಿನ ಹಿನ್ನೆಲೆಯಲ್ಲಿ ಗಿಟಾರ್, ಸಂತೂರ್(ಕೀಬೋರ್ಡಿನಲ್ಲಿ ಹೇಮಂತ್ ಕುಮಾರ್ ಅವರು ನುಡಿಸಿರುವುದು)-ಗಳು ಶ್ರಾವಣದ ಮಳೆ ಹನಿಗಳಂತೆ ಎಡೆಬಿಡದೆ ಸುರಿಯುತ್ತವೆ.

ಇಡೀ ಕವನ ಹೀಗಿದೆ.

ಅಗೋ ಅಲ್ಲಿ ದೂರದಲ್ಲಿ

೧

ಅಗೋ ಅಲ್ಲಿ ದೂರದಲ್ಲಿ

ನೆಲದ ಮುಗಿಲ ಮಗ್ಗುಲಲ್ಲಿ

ಹಸಿರಿನ ಹಸುಗೂಸದೊಂದು

ಆಗ ಈಗ ಹೊರಳುತಿಹುದು

ಏನೋ ಎಂತೊ ಒರಲುತಿಹುದು

ಆಽ ಹಸಿರ ಒಳಗೆ ಹೊರಗೆ

ನೀರ ಬೆಳಕ ತುಣುಕು ಮಿಣುಕು,

ಅಲ್ಲಿನಿಂದ ಬಂದೆಯಾ!

ಕುಣಿವ ಮಣಿವ ಹೆಡೆಯ ಹಾವು-

ಗಳನು ಹಿಡಿದು ತಂದೆಯಾ?

೨

ಏಕೆ ಬಂದೆ? ಏನು ತಂದೆ?

ಹೇಳೊ ಹೇಳು ಶ್ರಾವಣಾ

ನೀ ಬಂದ ಕಾರಣಾ.

೩

ಪಡುವ ದಿಕ್ಕಿನಿಂದ ಹರಿವ

ಗಾಳಿ-ಕುದುರೆಯನ್ನು ಏರಿ

ಪರ್ಜನ್ಯ ಗೀತವನ್ನು

ಹಾಽಡುತ್ತ ಬಂದಿತು.

೪

ಬನದ ಮನದ ಮೇಳವೆಲ್ಲ

ಸೋಽ ಎಂದು ಎಂದಿತು

ಬಿದಿರ ಕೊಳಲ ನುಡಿಸಿತು

ಮಲೆಯ ಹೆಳಲ ಮುಡಿಸಿತು;

ಬಳ್ಳಿ ಮಾಡ ಬಾಗಿಸಿತ್ತು

ಗಿಡಗಳ ತಲೆದೂಗಿಸಿತ್ತು;

ಮರದ ಹನಿಯ ಮಣಿಗಳನ್ನು

ಅತ್ತ ಇತ್ತ ತೂರುತಾ

ಹಸಿರು ಮುರಿವ ತೊಂಗಲನ್ನು

ಕೆಳಗೆ ಮೇಲೆ ತೂಗುತಾ

ಬರುವ ನಿನ್ನ ಅಂದ ಚೆಂದ

ಸೂಸು ಸೊಗಸು ಆನಂದ.

೫

ಗುಳ್ಳಗಂಜಿ ತೊಡವ ತೊಟ್ಟು

ಹಾವಸೆಯಾ ಉಡುಪನುಟ್ಟು

ನಗುವ ತುಟಿಯ ನನೆದ ಎವೆಯ

ತರಳ ನೀನು ಶ್ರಾವಣ,

ಅಳಲು ನಗಲು ತಡವೆ ಇಲ್ಲ

ಇದುವು ನಿನಗೆ ಆಟವೆಲ್ಲ

ಬಾರೊ ದಿವ್ಯ ಚಾರಣಾ

ತುಂಟ ಹುಡುಗ ಶ್ರಾವಣಾ!

೬

ನೀನು ನಡೆದು ಬಂದ ಮಾಸ

ಹೆಣ್ಗೆ ತವರುಮನೆಯ ವಾಸ

ಬರಿಯ ಆಟ, ಬರಿಯ ಹಾಸ

ಮಧುಮಾಸಕು ಹಿರಿದದು

ಮಧುರ ಮಾಸ ಸರಿಯದು.

೭

ಮೋಡಗವಿದ ಕಣ್ಣಿನವನು

ಮುದಿಯ ತಂದೆ ಮುಗಿಲರಾಯ

ನಿನ್ನನ್ನೆ ಬಯಸಿದಾ

ಕಣ್ಣ ಕೆನ್ನೆ ತೊಯ್ಸಿದಾ.

ಬಿಸಿಲಹಣ್ಣ ತಿಂದು ಹೊತ್ತು

ಹೆತ್ತ ನಿನ್ನ ಭೂಮಿ ತಾಯಿ

ಪಾಪ, ನಿನ್ನ ನೆನಸಿತು

ಎದೆಯ ಸೆರಗ ನನೆಸಿತು.

ಅಂತೆ ಬಂದೆ ಬಾರಣಾ

ಬಾರೊ ಮಗುವೆ ಶ್ರಾವಣಾ!

- ಅಂಬಿಕಾತನಯದತ್ತ

ನಾದಲೀಲೆ: 16

ಪ್ರಕಾಶನ: 1938

ಈ ಹಾಡುಗಳೆಲ್ಲವೂ Creative Commons Attribution-NonCommercial-NoDerivatives 4.0 International License ಹಾಗೂ standard YouTube license ಮೂಲಕ ಲಭ್ಯವಿವೆ. ಕವನದ Copyright ಇದರಲ್ಲಿ ಒಳಗೊಂಡಿಲ್ಲ.

These songs are licensed under a Creative Commons Attribution-NonCommercial-NoDerivatives 4.0 International License and standard YouTube license. This does not include the copyright on the poem.