ನಿಸ್ವನ - ಹೃದಯದಾಕಾಶ

ನಿಸ್ವನದ ಭಾಗವಾಗಿ...

• ಕವನ/ಕವನದ ಕಾಪೀರೈಟ್ ಕೃಪೆ: ಅಮೃತ ಸೋಮೇಶ್ವರ
• ರಾಗಸಂಯೋಜನೆ/ಗಾಯನ: ಅಂಶುಮಾನ್ ಕೆ ಆರ್
• ಸ್ಟೂಡಿಯೋ/ವಾದ್ಯಸಂಯೋಜನೆ/ವಯೊಲಿನ್: ಹೇಮಂತ್ ಕುಮಾರ್
• ಗಿಟಾರ್: ಡಿ ಶ್ರೀನಿವಾಸ್ ಆಚಾರ್ (ಗಿಟಾರ್ ಶ್ರೀನಿವಾಸ್)
• ತಾಳವಾದ್ಯ: ಬಿ ಎಸ್ ವೇಣುಗೋಪಾಲ್ ರಾಜು (ತಬಲಾ ವೇಣು)
• ಬಾನ್ಸುರೀ/ಕೊಳಲು: ರಘುನಂದನ್ ರಾಮಕೃಷ್ಣ
• ಸಿತಾರ್: ಅರ್ಜುನ್ ಆನಂದ್
• ಕೀಬೋರ್ಡ್: ಟೋನಿ ಮ್ಯಾಥ್ಯೂ
• ರಿದಮ್ ಪ್ಯಾಡ್: ವರದರಾಜ್
• ಧ್ವನಿತಂತ್ರಜ್ಞಾನ: ಬಾಲಕೃಷ್ಣ ರಾವ್

ಅಮೃತ ಸೋಮೇಶ್ವರರ "ಹೃದಯದಾಕಾಶ" ಎಂಬ ಈ ಹಾಡಿನಲ್ಲಿ ಪಾಶ್ಚಾತ್ಯ ಶಾಸ್ತ್ರೀಯ ಸಂಗೀತದ major scale (ಅಥವಾ ionian mode) (ಕರ್ನಾಟಕ ಶಾಸ್ತ್ರೀಯ ಸಂಗೀತದ ಶಂಕರಾಭರಣ, ಹಿಂದೂಸ್ಥಾನೀ ಶಾಸ್ತ್ರೀಯ ಸಂಗೀತದ ಬಿಲಾವಲ್ ರಾಗಗಳ ಸ್ವರಗಳು) ಹಾಗೂ ತುಸುವಾಗಿ mixolydian mode (ಕರ್ನಾಟಕ ಶಾಸ್ತ್ರೀಯ ಸಂಗೀತದ ಹರಿಕಾಂಭೋಜಿ ರಾಗದ ಸ್ವರಗಳು) ಕಾಣಬಹುದು.

ಇಡೀ ಕವನ ಹೀಗಿದೆ.

ಹೃದಯದಾಕಾಶ

೧

ಹೃದಯದಾಕಾಶದೊಳು ಉದಿಸಿ ಬಾ ಹೊಂಬೆಳಕೇ,

ಸದಯದಲಿ ಮುನ್ನಡೆಸು ಅರಿವು ಬೆಳಕೇ.

ಮಧುರವಾಗಲಿ ಬದುಕು, ಹಿಂಗಿ ಹೋಗಲಿ ಅಳುಕು,

ಮುದವರಳಿ ಬರಲೆಂದೇ ಎದೆಯ ಬಯಕೆ.

೨

ಎದೆಯುಳುದಿಸಿದ ಬೆಳಕು ವದನದಲಿ ಬೆಳಗಿರಲಿ

ಹದವಾಗಿ ಹಸನಿರಲಿ ಜೀವಲತೆಯು.

ಸದಮಲ ವಿವೇಕಸುಮ ಮಘಮಘಿಸಿ ಆನಂದ-

ಸುಧೆಯ ಸುಮನಸರಾಗಲೆಲ್ಲ ನರರು.

೩

ಸತ್ಯಚೇತನವಾಗಿ, ಸತ್ಯದೀಪವಾಗಿ,

ಕತ್ತಲೆಯ ಕೊತ್ತಳವ ಕಳೆದೊಗೆಯ ಬಾ.

ಬಿತ್ತರದ ಬಾಳಪಥವನು ತೋರು ಕೃಪೆ ಬೀರು.

ಉತ್ತಮಿಕೆಯನು ಹರಸು ಮುಂದೆ ನಡೆಸು.

೪

ಎಲ್ಲ ಮತಿ ಮತ ಮೀರ್ದ, ನನ್ನಿ ಬೇರುಂಟೆಂಬ

ಸೊಲ್ಲ ಮಿನುಗಿಸು ಎಮ್ಮ ಮತಿಗಳೊಳಗೆ.

ಎಲ್ಲವನು ತುಂಬಿ ಮತ್ತೆಲ್ಲವನು ಮೀರ್ದುದಕೆ

ಸಲ್ಲಲೆಮ್ಮಯ ನಮನ ದಿವ್ಯಶುಭಕೆ.

- ಅಮೃತ ಸೋಮೇಶ್ವರ

ಈ ಹಾಡುಗಳೆಲ್ಲವೂ Creative Commons Attribution-NonCommercial-NoDerivatives 4.0 International License ಹಾಗೂ standard YouTube license ಮೂಲಕ ಲಭ್ಯವಿವೆ. ಕವನದ Copyright ಇದರಲ್ಲಿ ಒಳಗೊಂಡಿಲ್ಲ.

These songs are licensed under a Creative Commons Attribution-NonCommercial-NoDerivatives 4.0 International License and standard YouTube license. This does not include the copyright on the poem.