ನಿಸ್ವನ - ಕಣ್ಣನೀರ ಹನಿ - ಇಂದ್ರನೀಲಮಣಿ

ನಿಸ್ವನದ ಭಾಗವಾಗಿ...

• ಕವನ/ಕವನದ ಕಾಪೀರೈಟ್: ಲಕ್ಷ್ಮೀಶ ತೋಳ್ಪಾಡಿ
• ರಾಗಸಂಯೋಜನೆ/ಗಾಯನ/ವೀಣೆ/ಗಿಟಾರ್: ಅಂಶುಮಾನ್ ಕೆ ಆರ್
• ಸ್ಟೂಡಿಯೋ: ಹೇಮಂತ್ ಕುಮಾರ್
• ಕೀಬೋರ್ಡ್/ಧ್ವನಿತಂತ್ರಜ್ಞಾನ: ಬಾಲಕೃಷ್ಣ ರಾವ್

ಲಕ್ಷ್ಮೀಶ ತೋಳ್ಪಾಡಿಯವರ 'ಅಹಲ್ಯೆ' ಗೀತರೂಪಕದ ನಾಂದೀ ಪದ್ಯದ ವಿಸ್ತೃತರೂಪವಾದ ಈ ಹಾಡು, ಭಾವಗೀತೆಯಾಚೆಗಿನ ಹೂವು.

ಇಲ್ಲಿ, ಗ್ರಹಭೇದದಿಂದ ಸಿಗುವ ಮೇಳಕರ್ತಗಳ ಜನ್ಯರಾಗಗಳನ್ನು ಬಳಸಿ, ಷಡ್ಜಶ್ರುತಿಯಲ್ಲಿ ಕರ್ನಾಟಕ ಶಾಸ್ತ್ರೀಯ ಸಂಗೀತದ ನಳಿನಕಾಂತಿ, ಪಂಚಮಶ್ರುತಿಯಲ್ಲಿ ಹಿಂದೂಸ್ತಾನೀ ಶಾಸ್ತ್ರೀಯ ಸಂಗೀತದ ರಾಗೇಶ್ರೀ ಹಾಗೂ ಗೋರಖ್ ಕಲ್ಯಾಣ್ ರಾಗಗಳ ಗಾಯನವನ್ನು, Jazz-ಶೈಲಿಯ ಗಿಟಾರ್ ಸ್ವರಮಂಡಲದಂತೆ ಹಾಗೂ ವೀಣೆ, ಹದವಾಗಿ ಅನುಸರಿಸುತ್ತವೆ.

ಇಡೀ ಕವನ ಹೀಗಿದೆ.

ಕಣ್ಣನೀರ ಹನಿ - ಇಂದ್ರನೀಲಮಣಿ

೧

ಕಣ್ಣನೀರ ಹನಿ ಇಂದ್ರನೀಲಮಣಿ

ತಾವರೆಯ ಕಂಗಳಲ್ಲಿ

ಆರ್ತಗದ್ಗದವೆ ಗಮಕವಾದೀತು

ಶ್ರುತಿಶುದ್ಧ ಕಂಠದಲ್ಲಿ

೨

ಶಿವವ್ಯೋಮಕೇಶ ಅದು ಎಂಥ ಪಾಶ

ಆ ವ್ಯೋಮದಲ್ಲಿ ಚಂದ್ರ

ರುದ್ರ ನೆತ್ತಿಯಲಿ ಕ್ಷುದ್ರನಾಗುವನೆ

ಸುರಿಸುವನು ನಿತ್ಯ ಜೊನ್ನ.

೩

ಮೊಲೆಹಾಲು ಹನಿಯ ಹನಿಹನಿಗೆ ತಣಿಯ

ಗೋಕುಲದ ಪುಟ್ಟಕಂದ

ಕಟವಾಯಿಯಲ್ಲಿ ವಿಷವಿಳಿದು ಹೋಗೆ

ಪೂತನಿಗೆ ತಾಯ್ತನವ ತಂದ.

೪

ಹೆಣ್ಣುಜಿಂಕೆಯ ಕಣ್ಣ ತಣ್ಣನೆಯ ಬಟ್ಟಲಲಿ

ಭಯವೆ ಅಚ್ಚರಿಯಾಗಿ ಬೆಳೆದು

ಹುಲ್ಲೆಸಳ ತುದಿಯ ಇಬ್ಬನಿಯ ಧ್ಯಾನದಲಿ

ಆಗಸವೆ ಇಳಿದು ಬಂದು

೫

ನಮ್ಮ ಸಮಯಕ್ಕೆ ಕವಿಸಮಯ ಬರಲಿ

ವಿಸ್ಮಯವೆ ತುಳುಕಲಲ್ಲಿ

ಹಂಬಲದ ಹೊಕ್ಕುಳಲಿ ಮೊಗ್ಗಾದ ತಾವರೆಗೆ

ಇಂಬೆಲ್ಲಿ? ಕೆಸರಲ್ಲಿ? ಮಿತ್ರಕಿರಣದಲ್ಲಿ?

- ಲಕ್ಷ್ಮೀಶ ತೋಳ್ಪಾಡಿ

'ಅಹಲ್ಯೆ' ಗೀತರೂಪಕದ ನಾಂದೀ ಪದ್ಯದ ವಿಸ್ತೃತರೂಪ

ಈ ಹಾಡುಗಳೆಲ್ಲವೂ Creative Commons Attribution-NonCommercial-NoDerivatives 4.0 International License ಹಾಗೂ standard YouTube license ಮೂಲಕ ಲಭ್ಯವಿವೆ. ಕವನದ Copyright ಇದರಲ್ಲಿ ಒಳಗೊಂಡಿಲ್ಲ.

These songs are licensed under a Creative Commons Attribution-NonCommercial-NoDerivatives 4.0 International License and standard YouTube license. This does not include the copyright on the poem.