ನಿಸ್ವನ - ಚೈತ್ಯಾಲಯ

ನಿಸ್ವನದ ಭಾಗವಾಗಿ...

• ಕವನ: ಅಂಬಿಕಾತನಯದತ್ತ
• ಕವನದ ಕಾಪೀರೈಟ್ ಕೃಪೆ: ಪುನರ್ವಸು ಬೇಂದ್ರೆ
• ರಾಗಸಂಯೋಜನೆ/ಗಾಯನ/ವೀಣೆ: ಅಂಶುಮಾನ್ ಕೆ ಆರ್
• ಸ್ಟೂಡಿಯೋ/ವಾದ್ಯಸಂಯೋಜನೆ: ಹೇಮಂತ್ ಕುಮಾರ್
• ಬಾನ್ಸುರೀ: ಆನಂದ ಪ್ರಸನ್ನ ಪಟ್ಟನಾಯಕ್ (Flute Butto)
• ತಾಳವಾದ್ಯ: ಬಿ ಎಸ್ ವೇಣುಗೋಪಾಲ್ ರಾಜು (ತಬಲಾ ವೇಣು)
• ಕೀಬೋರ್ಡ್: ಟೋನಿ ಮ್ಯಾಥ್ಯೂ (Tony Mathew)
• ಸಿತಾರ್: ಸುಬ್ರಹ್ಮಣ್ಯ ಹೆಗಡೆ
• ಧ್ವನಿತಂತ್ರಜ್ಞಾನ: ಬಾಲಕೃಷ್ಣ ರಾವ್

ಈ ಹಾಡು ಹಿಂದುಸ್ಥಾನಿ ಶಾಸ್ತ್ರೀಯ ಸಂಗೀತದ ಜಂಜೂಟಿ ರಾಗದಲ್ಲಿದೆ.

ಇಡೀ ಕವನ ಹೀಗಿದೆ.

ಚೈತ್ಯಾಲಯ

೧

ಶಿವನುಂಡ ನಂಜು ತಿಳಿಗೊಂಡು ಮಂಜು-

ಮಂಜಾಗಿದೆ ಈ ಸಂಜಿಗೆ.

ಇದು ಉಷಾಮಿಷದ ಪೊಸನೇಹ ಸೇರಿ ಕಳೆ

ಏರಿದೆ ಹುರಿಮಂಜಿಗೆ.

ಭೌಮಾತ್ಮಭೂತಿ ಚೈತನ್ಯದೂತಿ, ಊ-

ರ್ಜಿತದಾ ಸಿರಿವಂತಿಗೆ.

ಕಥಕ್ಕಳಿಯ ಪುತ್ಥಳಿಯೆ! ಪೃಥಕ್ ಥತ್

ತಳಿಸಿದೆ ಜೀವಂತಿಗೆ.

ಜಡೆತುಂಬ ಕಣ್ಣು, ಇದು ಯಾವ ಹೆಣ್ಣು? ಮಾ-

ಪ್ರಾಣದ ಸ್ಯಾವಂತಿಗೆ!

೨

ಯಾವ ಅಚ್ಚರಸಿ? ಯಾವ ಋಷಿಯರಸಿ?

ಯಾವ ಭಾವರಸಿ?

ಯಾವ ಘಟ್ಟದಲಿ? ಯಾವ ಪಟ್ಟದಲಿ?

ಯಾವ ಮುಹೂರ್ತವಿರಿಸಿ?

ಯಾವ ನಕ್ಷತ್ರ? ಯಾವ ಸುಕ್ಷೇತ್ರ?

ಯಾವ ಪಾತ್ರ ಧರಿಸಿ?

ಝಂಝಣಣ ಝಣಣ, ಝಂಝಣತ್ ಝಣಣ, ಜೀ-

ವಾಣುವೃಂದ ಮೆರೆಸಿ,

ಛಂದ ಛಂದ ನವಬಂಧ ಪಡೆದು ಬಂ-

ದಿಹವು ಹಳತ ಮರೆಸಿ.

೩

ಛಿಳಿಲ್ ಛಿಟಿಲೆಂದು ಭುಕ್ಕ್ ಭುಗಿಲೆಂದು

ತಟಿತ್ ತಟ್ಟಿತೆಂದೂ

ಕಣ್ಣಮುಚ್ಚಣಿಕೆ ಕಣ್ಣ ತೆರೆವಣಿಕೆ

ಕಣ್ಣಕಟ್ಟಿತೆಂದೂ

ನವೋನವದ ಭವಭವದ ತವದ ವೈ

ಭವದ ಒಟ್ಟಿತಂದು

ಕುರುಡು ಬಯಲಿಗಿಗೊ ಕಣ್ಣು ಬರೆವ ಕೈ-

ವಾಡ ಚಿಗುರ್ತಿಂದು

ದುಂದುದುಂದು ದುಂದುಭಿಸುತಿಹುದು ಇಕೊ

ಹಲವು ಮುಖದಲೊಂದು.

೪

ಬಾರೋ ಇಲ್ಲಿ ಬೈರಾಗಿ ಬಾರೊ, ಬಾ

ಇಲ್ಲಿದೆ ತಂಗುವ ಸ್ಥಲಾ-

ತಣಿವನರಿಯದೇ ದಣಿದುಹೋದೆ, ಬಾ

ಇಲ್ಲಿದೆ ಇಂಗದ ಜಲಾ-

ಏಕೆ ರೋಸಿ, ಭಯಗೊಂಡು ಹೇಸಿ, ನೀ,

ಆಕ್ರೋಶಿಸುತಿಹೆ ಎಲಾ!

ಶಿವದ ಭಕ್ತಿಗವತಾರಶಕ್ತಿಗಿಗೊ

ಇದುವೇ ಇಂಗಿತವಲಾ!

ಬ್ರಹ್ಮಸ್ಫುರಣಕೆ ಮರಣವೆಂತು? ಅದು

ಅದುವೇ ಅಮೃತದ ಬಲಾ.

೫

ಹಿಮಾಲಯದ ಒಳಬಸಿರಲೆ ಕೊರೆದಿದೆ

ಯಾವುದೊ ಬ್ರಹ್ಮಾಭಯಾ-

ಚಿತ್ರನೇತ್ರಗಳು ಉನ್ಮೀಲಿಸುತಿವೆ

ಓಹೊ ತಾರಕಾಮಯಾ!

ಸೃಷ್ಟಿಯ ಕಲೆಯಾ, ಮಾಯೆಯ ಬಲೆಯಾ

ಬೀಸಿದೆ ಉದಯದ ನಯಾ

ಅರವಿಂದ ಮಿಂದ ಅರವಿಂದ ಗಂಧ ಅರಿ-

ವಿಂದಲೆ ಬಂದಿದೆ ಜಯಾ.

ಚಿತ್ತಚಿತ್ತಗಳ ಪಾತ್ರ ಕುಣಿಯುತಿವೆ

ಕಟ್ಟಿದೆ ಚೈತ್ಯಾಲಯ.

- ಅಂಬಿಕಾತನಯದತ್ತ    

ಚೈತ್ಯಾಲಯ: 51

ಪ್ರಕಾಶನ: 1957

ಈ ಹಾಡುಗಳೆಲ್ಲವೂ Creative Commons Attribution-NonCommercial-NoDerivatives 4.0 International License ಹಾಗೂ standard YouTube license ಮೂಲಕ ಲಭ್ಯವಿವೆ. ಕವನದ Copyright ಇದರಲ್ಲಿ ಒಳಗೊಂಡಿಲ್ಲ.

These songs are licensed under a Creative Commons Attribution-NonCommercial-NoDerivatives 4.0 International License and standard YouTube license. This does not include the copyright on the poem.